कृषी हवामान : पावसाचा जोर वाढला! पुढील 4 दिवस धुमाकूळ घालणार, या जिल्ह्यांना धोक्याचा इशारा

मध्य महाराष्ट्रातील पुणे, सातारा आणि कोल्हापूर जिल्ह्यांच्या घाटमाथ्यावरही मुसळधार पावसाची शक्यता वर्तवण्यात आली आहे. गेल्या काही दिवसांत या भागात पावसाने हजेरी लावल्याने नद्यांमध्ये पाण्याची पातळी वाढली आहे. त्यामुळे अधिक पाऊस झाल्यास पूरजन्य परिस्थिती उद्भवू शकते. शेतकऱ्यांनी पेरणीची कामे वेळीच उरकावी आणि धोकादायक ठिकाणी न जाण्याचे आवाहन करण्यात आले आहे.

उत्तर महाराष्ट्रातील नंदुरबार, धुळे, जळगाव आणि नाशिक जिल्ह्यांना हवामान विभागाने बुधवारी मुसळधार पावसाचा इशारा दिला आहे. गेल्या आठवड्यात या भागात तुरळक पाऊस झाल्याने पिकांना जीवदान मिळालं होतं. मात्र पुढील काळात मुसळधार पाऊस झाला तर काही ठिकाणी पिकांचे नुकसान होऊ शकते.

विदर्भात मात्र पावसाने पाठ फिरवल्याने नागरिक त्रस्त झाले आहेत. सतत वाढणारे तापमान आणि उकाड्यामुळे जनजीवन हैराण झाले आहे. अमरावती, भंडारा, चंद्रपूर, गोंदिया आणि नागपूर या जिल्ह्यांत वादळी वाऱ्यासह काही ठिकाणी पावसाच्या सरी पडण्याचा अंदाज व्यक्त केला गेला आहे.

राज्याच्या विविध भागांत पावसाची स्थिती वेगळी असली तरी पुढील काही दिवस पावसाने धडक दिल्यास शेती, वाहतूक आणि दैनंदिन व्यवहारांवर परिणाम होण्याची शक्यता तज्ज्ञांनी व्यक्त केली आहे.