Agriculture News : उत्तम दर्जाचे कांदा रोप हवंय का? मग रोपवाटिकेचे व्यवस्थापन करताना ‘या’ टिप्स नक्की वापरा

एका एकर कांद्याच्या लागवडीसाठी सुमारे 2 गुंठे क्षेत्रावर रोपवाटिका तयार करणे आवश्यक असते. यासाठी 2 ते 3 किलो चांगल्या प्रतीचे बियाणे पुरेसे ठरते. बियाणे पेरण्याआधी रोगप्रतिकारक शक्ती वाढवण्यासाठी प्रति किलो बियाण्यास 2 ग्रॅम कार्बेन्डाझीम हे बुरशीनाशक चोळावे.

पेरणीपूर्वी 200 किलो चांगले कुजलेले शेणखत आणि 500 ग्रॅम ट्रायकोडर्मा व्हीरिडी मातीमध्ये मिसळणे फायद्याचे ठरते. यामुळे मातीतील फायदेशीर सूक्ष्मजीवांची संख्या वाढते आणि बुरशीजन्य रोगांना अटकाव होतो. रोपवाटिकेसाठी गादीवाफे 10-15 सें.मी. उंचीचे, 1-1.2 मीटर रुंदीचे आणि गरजेनुसार लांबीचे तयार करावेत. हे वाफे जमिनीच्या उताराला आडवे असावेत, जेणेकरून पाणी साचत नाही आणि रोपे कुजत नाहीत.

रोपे उगवण्याच्या सुरुवातीस झारीने पाणी द्यावे, नंतर ठिबक किंवा पाटपाणी पद्धत वापरू शकतो. पाणी नियंत्रित प्रमाणात दिल्यास रोपे सशक्त बनतात आणि त्यांच्या मुळांची गाठ लवकर तयार होते.

वाफ्यावर 1600 ग्रॅम नत्र आणि 400 ग्रॅम पालाश प्रति 200 वर्ग मीटर या प्रमाणात खते मिसळावीत. रुंदीशी समांतर 5 ते 7.5 सें.मी. अंतरावर रेघा पाडून, 1 ते 1.5 सें.मी. खोलीवर बियाणे टाकावे. पेरणीनंतर बियाण्यांवर कुजलेले शेणखत किंवा कंपोस्ट खताची हलकी थर द्यावी.

तण नियंत्रणासाठी रोपे उगवण्याआधीच पेंडीमिथैलीन 2 मिली प्रति लिटर पाण्यात मिसळून वाफ्यावर फवारणी करावी. पेरणीनंतर 20 दिवसांनी हाताने खुरपणी करून 800 ग्रॅम नत्र प्रति 200 वर्ग मीटर या प्रमाणात टाकावे, यामुळे रोपांची वाढ वेगाने होते.