Bacchu Kadu Uposhan : आज निर्णय झाला नाहीतर 16 तारखेपासून.. बच्चू कडूंचा राज्य सरकारला कडक इशारा

आंदोलनाचे स्वरूप तीव्र

बच्चू कडू यांच्या अन्नत्याग आंदोलनाला राज्यभरातून पाठिंबा मिळत आहे. त्यांचे कार्यकर्ते आणि शेतकरी विविध ठिकाणी सरकारविरोधात आक्रमक झाले आहेत. पुण्यातील उपमुख्यमंत्री अजित पवार यांच्या एका कार्यक्रमात शेतकऱ्यांनी घोषणाबाजी करत सरकारच्या उदासीनतेचा निषेध केला.

बच्चू कडूंचा इशारा

सरकारच्या दिरंगाईवर रोष व्यक्त करत बच्चू कडू यांनी थेट जलत्यागाचा इशारा दिला आहे. त्यांनी म्हटलं की, “कर्जमाफीचा निर्णय आतापर्यंत व्हायला हवा होता. सरकार फक्त बोलतंय, पण ठोस पाऊल उचलत नाही. अहवाल कुठं आहे? तारीख सांगत नाहीत. निर्णयच होत नाहीय. मी आंदोलन करत आहे कारण माझ्या कार्यकर्त्यांवर आक्रमण होतंय, शेतकरी त्रस्त आहे आणि सरकार शांत आहे. आता जर 16 तारखेपर्यंत निर्णय झाला नाही, तर मी जलत्याग करणार आहे.”

कार्यकर्त्यांना संयमाचे आवाहन

आंदोलनाची तीव्रता वाढत असली तरी बच्चू कडू यांनी आपल्या कार्यकर्त्यांना संयम ठेवण्याचे आवाहन केले आहे. त्यांनी म्हटलं की,

“आज निर्णय होईपर्यंत कुणीही आक्रमक पाऊल उचलू नये. आपण लढतो आहोत शेतकऱ्यांसाठी, पण शिस्तीने. पोलिस बंदोबस्त लावतात म्हणून आमचं आंदोलन थांबणार नाही. रोज थोडं थोडं मरण्यापेक्षा एकदाच मरण परवडेल, ही भावना आमच्या कार्यकर्त्यांमध्ये आहे.”