Agriculture News : विजेसंदर्भात उपमुख्यमंत्री अजित पवारांची मोठी घोषणा! शेतकऱ्यांना दिवसा वीज देणार

सकाळपासून सूर्यास्तापर्यंतच वीज

अजित पवार म्हणाले, “आत्तापर्यंत आठवड्याचे काही दिवस दिवसा, काही दिवस रात्री वीज दिली जात होती. पण शेतकऱ्यांना वन्यप्राण्यांचा धोका असून, रात्री शेतात जाणं जीवावर बेततं. त्यामुळे आता सूर्योदयापासून सूर्यास्तापर्यंतच वीज दिली जाईल आणि रात्री वीजपुरवठा बंद राहील. यामुळे शेतकरी रात्री घरात सुरक्षित झोपू शकतील.”

बिबटे, रानगवे, डुकरांचे हल्ले वाढले

राज्यात बिबटे, रानगवे, रानडुकर यांसारख्या वन्यप्राण्यांचा वावर वाढला आहे. अनेक जिल्ह्यांमध्ये रात्रीच्या वेळी शेतकऱ्यांवर हल्ले झाल्याचे प्रकार घडले आहेत. रात्री वीजपुरवठा असल्याने शेतकऱ्यांना पाण्यासाठी शेतात जावं लागतं आणि त्यामुळे जीवाची जोखीम वाढते.

शेतकऱ्यांची मागणी अखेर मान्य

शेतकऱ्यांनी गेल्या अनेक वर्षांपासून दिवसा 12 तास अखंडित वीज पुरवठा करण्याची मागणी केली होती. मुख्यमंत्री बळीराजा मोफत वीज योजना सुरू असली तरी, वीज पुरवठा प्रामुख्याने रात्री होत असल्याने शेतकऱ्यांना अपेक्षित लाभ मिळत नव्हता. या निर्णयामुळे शेतकऱ्यांचे जीवन सुरक्षित आणि सुलभ होण्याची अपेक्षा आहे.

शेतकरी नेत्यांचा सवाल

शेतकरी नेत्यांचे म्हणणे आहे की, दिवसा वीज देण्याची घोषणा यापूर्वीही झाली होती, पण व्यवहारात ती अंमलात आणली गेली नाही. या वेळी शासनाने फक्त घोषणा न करता, सर्व भागांमध्ये अखंडित आणि नियमित वीज पुरवठा होईल याची खात्री द्यावी.

नवीन धोरणाच्या शक्यता

या निर्णयामुळे राज्यात नवीन वीज वितरण आराखडा तयार केला जाण्याची शक्यता आहे. वीज वितरण कंपन्यांना दिवसा वीज देण्यासाठी स्मार्ट लोड मॅनेजमेंट करावं लागणार असून, उत्पन्न आणि मागणी यामध्ये संतुलन साधणं हे मोठं आव्हान असेल. या निर्णयामुळे शेतकऱ्यांचा दैनंदिन धोका कमी होईल आणि शेतीची उत्पादकता व सुरक्षितता वाढेल, अशी सर्वसामान्य अपेक्षा व्यक्त केली जात आहे.