पूर्वहंगाम कपाशीला बोंड अळीचा विळखा! पिकावर होताय हे गंभीर परिणाम, वाचा सविस्तर

पारंपरिक पद्धतीने, बोंडअळीच्या नियंत्रणासाठी बीटी कपाशीच्या बियाण्यांची विक्री 31 मेनंतरच केली जात होती. या विलंबाचा उद्देश म्हणजे कपाशीची पेरणी मान्सून सुरू झाल्यानंतरच व्हावी, जेणेकरून बोंडअळीच्या जीवनचक्रात अडथळा निर्माण करता येतो. मात्र, यंदा ही विक्री 15 दिवस आधी सुरू झाल्याने काही शेतकऱ्यांनी पेरणी लवकर सुरू केली आहे. परिणामी, बोंडअळीचा प्रसार वाढण्याची शक्यता वाढली आहे.

शेतकऱ्यांत नाराजीचा सूर

शेतकरी आणि कृषी तज्ज्ञ यांच्यात चिंता व्यक्त केली जात आहे की लवकर लागवडीमुळे कीटकनाशकांच्या वापरात वाढ होईल, उत्पादन खर्च वाढेल आणि पिकाचे नुकसानही मोठ्या प्रमाणावर होऊ शकते. काही भागांत संरक्षित सिंचनाची सुविधा असल्यामुळे शेतकरी मान्सूनपूर्वच पेरणी करत आहेत. हेच प्रादुर्भाव वाढवणारे ठरत असल्याचे निरीक्षण कृषी विभागानेही नोंदवले आहे.

बीटी बियाण्यांची मागणी मोठी

राज्यात यंदा 10.60 लाख हेक्टर क्षेत्रावर कपाशीची लागवड अपेक्षित असून, त्यासाठी एकूण 54.33 लाख बीटी बियाण्यांच्या पाकिटांची मागणी नोंदवण्यात आली आहे. अकोला जिल्ह्यात सर्वाधिक म्हणजेच सुमारे 6.36 लाख पाकिटांची आवश्यकता भासत आहे. त्यानंतर वाशिममध्ये 1.54 लाख आणि बुलढाणा जिल्ह्यात 93,995 पाकिटांची नोंद आहे.

बोंडअळीवरील नियंत्रणासाठी सामूहिक उपायांची गरज

बीटी बीजी-2 वाणांमध्ये बोंड अळीविरोधात प्रतिकारशक्ती असली तरीही प्रत्यक्षात गुलाबी बोंडअळीचा संसर्ग काही प्रमाणात आढळतोच. त्यामुळे ही समस्या हाताळण्यासाठी केवळ व्यक्तिशः उपाययोजना न करता सामूहिक स्तरावर नियंत्रण आवश्यक असल्याचे कृषी तज्ज्ञांचे म्हणणे आहे.