कृषी हवामान : पेरणीसाठी घाई नकोच! पुढील 48 तास धोक्याचे, या जिल्ह्यांसाठी हवामान विभागाकडून रेड अलर्ट

शेतकऱ्यांनी पेरणीसाठी घाई करू नये

काही दिवसांसाठी विश्रांती घेतलेल्या पावसाने पुन्हा एकदा हजेरी लावण्यास सुरवात केली आहे. राज्यातील शेतकरी शेतजमिनीची पूर्व मशागत करून पेरणीसाठी सज्ज झाला आहे. मात्र पुढील 48 तासांत मुसळधार पाऊस पडण्याची शक्यता वर्तवण्यात आली आहे. अशा परिस्थितीमध्ये पेरणी केली तर बियाणे वाहून जाण्याची शक्यता जास्त आहे.त्यामुळे अंदाज घेऊनच निर्णय घ्यावा.

कोकणात मुसळधार पावसाचा इशारा

तळ कोकणात हवामानाचा जोरदार बदल झाल्याचे चित्र दिसत आहे. पुढील 13 ते 17 जूनदरम्यान या भागात अतिमुसळधार पावसाचा अंदाज वर्तवण्यात आला आहे. रेड अलर्टचा सामना करावे लागणाऱ्या जिल्ह्यांमध्ये रत्नागिरी, सिंधुदुर्ग आणि रायगड यांचा समावेश असून, या भागांत दरडी कोसळणे, पूरस्थिती निर्माण होणे यासारख्या घटनांचा धोका आहे.

मुंबई व पश्चिम महाराष्ट्रात वातावरणात उलथापालथ

मुंबई, नवी मुंबईसह उपनगरांत आज सकाळपासूनच हलकासा पाऊस सुरू असून, उकाड्यातून काहीसा दिलासा मिळालाय. मात्र, पश्चिम महाराष्ट्र आणि घाटमाथा परिसरात हवामान अधिकच अस्थिर होत असून, नाशिक आणि पुणे परिसरात विजांच्या कडकडाटासह मुसळधार पावसाचा इशारा देण्यात आला आहे. घाटमाथ्यावर प्रवास करणाऱ्यांनी अत्यंत काळजी घेण्याचे आवाहन आहे.

मराठवाड्यात सर्व जिल्ह्यांवर यलो अलर्ट

मराठवाड्यातील लातूर, नांदेड, धाराशिव, बीड, जालना, परभणी, हिंगोली आणि छत्रपती संभाजीनगर या आठही जिल्ह्यांत यलो अलर्ट देण्यात आला आहे. काही ठिकाणी जोरदार पावसासोबतच विजांचा कडकडाट होण्याची शक्यता वर्तवण्यात आली आहे. यामुळे शेतकरी, विद्यार्थी व सर्वसामान्य नागरिकांनी सतर्क राहावे.

विदर्भात वादळी वाऱ्यांचा इशारा

विदर्भातील अकोला, अमरावती, नागपूर, चंद्रपूर, गोंदिया आणि गडचिरोली जिल्ह्यांमध्ये ऑरेंज अलर्ट जारी करण्यात आला आहे. येथे वादळी वाऱ्यासह मध्यम ते जोरदार पावसाची शक्यता आहे. उर्वरित जिल्ह्यांमध्ये यलो अलर्ट असून, हवामान विभागाने नागरिकांना आवश्यक खबरदारी घेण्याचा इशारा दिला आहे.

मान्सून प्रगतीपथावर

सध्या मान्सूनची उत्तर सीमा मुंबई, अहिल्यानगर, आदिलाबाद, भवानीपट्टणम, पुरी, सॅंड हेड्स बेट आणि बालूरघाट या मार्गावर आहे. येत्या दोन दिवसांत विदर्भ, छत्तीसगड व ओडिशातील काही भागांत मान्सून आणखी पुढे सरकण्याची शक्यता आहे. पूर्व भारतात सध्या फारसा बदल नाही, पण त्यानंतर तापमानात 2-3 अंशांनी घट होण्याची शक्यता आहे.