Agriculture News : देवस्थानांनी शेतीसाठी दिलेली जमीन विकत घेऊ शकतो का? नियम काय सांगतो? वाचा सविस्तर

महाराष्ट्र देवस्थान व्यवस्थापन कायदा किंवा महाराष्ट्र सार्वजनिक विश्वस्तव्यवस्था कायदा यानुसार देवस्थान ट्रस्टच्या मालकीची मालमत्ता ‘धार्मिक उद्देशासाठी’ असते. त्यामुळे अशा जमिनींची विक्री करण्यासाठी संबंधित धर्मादाय आयुक्तांची (Charity Commissioner) पूर्वपरवानगी बंधनकारक आहे. ही परवानगी न घेता देवस्थानची जमीन कोणालाही विकता किंवा ताब्यात देता येत नाही.

धर्मादाय आयुक्त कार्यालय या अर्जाची सखोल छाननी करते. त्या प्रक्रियेत शेतकऱ्यांनी किंवा पट्टेदारांनी आपले म्हणणे मांडण्याची संधी दिली जाते. काही प्रकरणांमध्ये, जेथे शेतकरी अनेक वर्षांपासून ही जमीन कसत आलेले असतात, तिथे त्यांना ‘पट्टेदार हक्क’ दिला जाऊ शकतो. मात्र तरीही अंतिम मालकी हस्तांतर करण्यासाठी धर्मादाय आयुक्तांची मान्यता घेणे अनिवार्य असते.

जर परवानगी मिळाली, तर ठरावीक बाजारमूल्यावर किंवा शासनाने ठरवलेल्या दरावर विक्री प्रक्रिया राबवली जाते. विक्रीची रक्कम देवस्थानच्या खात्यात जमा केली जाते आणि ती इतर कोणत्याही संस्थेसाठी वापरता येत नाही.