रेशन कार्डसंदर्भातील महत्वाची अपडेट! फक्त एक दिवस शिल्लक, हे काम न केल्यास कार्ड होणार बंद

सर्वोच्च न्यायालय आणि केंद्र सरकारने राज्य सरकारला राष्ट्रीय अन्नसुरक्षा योजनेतील सर्व लाभार्थ्यांची ई-केवायसी पडताळणी करण्याच्या सूचना यापूर्वीच दिल्या होत्या. त्यानुसार राज्यातील सर्व रास्त भाव दुकानांवर (राशन दुकान) ई-केवायसी मोहीम राबवली जात आहे आणि ही प्रक्रिया लवकरात लवकर पूर्ण करण्याचे निर्देश सर्व क्षेत्रीय कार्यालयांना देण्यात आले आहेत.

ई-केवायसी कशी करावी?

ई-केवायसी प्रक्रिया खालीलपैकी कोणत्याही एक पद्धतीने पूर्ण करता येते:

1) रास्त भाव दुकान

आपल्या जवळच्या शिधावाटप केंद्रावर (राशन दुकान) जा. शिधापत्रिका आणि आधार कार्ड सोबत घ्या. दुकानात बायोमेट्रिक मशीनद्वारे अंगठ्याचा ठसा देऊन आधार पडताळणी केली जाईल. यानंतर तुमची ई-केवायसी पूर्ण झाली समजली जाईल.

2) मोबाईल अ‍ॅपद्वारे (Mera KYC App):

Google Play Store किंवा Apple App Store वरून “Mera KYC” हे अ‍ॅप डाउनलोड करा.अ‍ॅपमध्ये शिधापत्रिका क्रमांक व आधार क्रमांक प्रविष्ट करा. ओटीपीद्वारे मोबाईल पडताळणी करा. आधारशी संलग्न असलेल्या नावाची पुष्टी करा. आवश्यक असल्यास बायोमेट्रिक पडताळणीसाठी नजीकच्या सेवा केंद्रावर भेट द्या.

3)  महा ई-सेवा केंद्र / CSC केंद्र

जवळच्या CSC (Common Service Center) किंवा महा ई-सेवा केंद्रावर भेट द्या. तिथे कर्मचाऱ्यांच्या मदतीने बायोमेट्रिक व आधार पडताळणी करून ई-केवायसी पूर्ण करता येते.

ई-केवायसी 30 एप्रिलपूर्वी पूर्ण करणे अनिवार्य आहे. ही प्रक्रिया एकदाच केली जाणारी आहे. आधार क्रमांक आणि शिधापत्रिकेवरील नावामध्ये विसंगती असल्यास ती तात्काळ सुधारावी.ई-केवायसी झाल्यानंतर पुन्हा केवायसी करण्याची गरज नाही. ई-केवायसीची प्रक्रिया वेळेत पूर्ण करून आपली शिधापत्रिका सुरूच राहील याची खात्री करा.