Last Updated:
Agriculture News : महाराष्ट्र राज्य वीज वितरण कंपनी (MSEDCL) ने राज्यातील शेतकऱ्यांसाठी सौर कृषी पंपांसंदर्भातील तांत्रिक अडचणी आणि समस्यांचे तातडीने निराकरण करण्यासाठी विशेष हेल्पलाइन सेवा सुरु केली आहे.
मुंबई : महाराष्ट्र राज्य वीज वितरण कंपनी (MSEDCL) ने राज्यातील शेतकऱ्यांसाठी सौर कृषी पंपांसंदर्भातील तांत्रिक अडचणी आणि समस्यांचे तातडीने निराकरण करण्यासाठी विशेष हेल्पलाइन सेवा सुरु केली आहे. आतापर्यंत राज्यात 5.65 लाख सौर कृषी पंप बसवण्यात आले असून, आगामी काळात आणखी 5 लाख नवीन सौर पंप बसवण्याचे नियोजन आहे.
तक्रारींसाठी सोपी आणि मोफत सेवा
पावसाळ्यात आलेल्या जोरदार वाऱ्यांमुळे आणि मुसळधार पावसामुळे सौर पंपांचे नुकसान झाल्याच्या अनेक तक्रारी आल्या होत्या. सौर पॅनेल्सचे तांत्रिक बिघाड, पंप बंद पडणे, पाण्याचा दाब कमी होणे, तसेच उपकरणांची चोरी. या समस्यांवर तत्काळ उपाय मिळावा, म्हणून MSEDCL ने 1800-233-3435 आणि 1800-212-3435 हे टोल-फ्री क्रमांक आणि www.mahadiscom.in/solar_MTSKPY हे विशेष पोर्टल कार्यान्वित केले आहे.
ऑनलाइन आणि कॉल द्वारे तक्रार नोंदणी
शेतकरी आता घरबसल्या या टोल-फ्री क्रमांकांवर फोन करून किंवा अधिकृत पोर्टलवर लॉगइन करून आपली तक्रार सहज नोंदवू शकतात. तक्रार नोंदवताना नोंदणीकृत मोबाईल क्रमांक, लाभार्थी क्रमांक, तसेच गाव, तालुका व जिल्ह्याची माहिती देणे आवश्यक आहे.
पंपांसाठी विमा संरक्षण व तीन दिवसात सेवा द्यावी लागणार
या योजनेचा महत्त्वाचा भाग म्हणजे प्रत्येक सौर पंपाला विमा संरक्षण दिले गेले आहे. त्यामुळे झालेल्या नुकसानीची भरपाई किंवा दुरुस्ती त्वरित केली जाईल. तक्रार नोंदविल्यानंतर 3 दिवसांच्या आत संबंधित पुरवठादार कंपनीने समस्या सोडवणे अनिवार्य आहे. MSEDCL ने सर्व पुरवठादार कंपन्यांना जिल्हानिहाय सेवा केंद्रे स्थापन करण्याचे निर्देशही दिले आहेत. तक्रार सोडवल्यानंतर शेतकऱ्यांना SMS द्वारे सूचना मिळणार असून, यामुळे प्रक्रियेत पारदर्शकता व विश्वास वाढेल.
MSEDCL कडून शेतकऱ्यांना आवाहन
MSEDCL चे अध्यक्ष व व्यवस्थापकीय संचालक लोकेश चंद्रा यांनी शेतकऱ्यांना या सेवेचा पुरेपूर लाभ घ्यावा, असे आवाहन केले आहे. या उपक्रमामुळे शेतकऱ्यांचा वेळ, पैसा आणि मनस्ताप वाचणार असून, सौर पंपांच्या देखभाल-दुरुस्तीची प्रक्रिया अधिक सुलभ आणि विश्वासार्ह ठरेल. यामुळे शेतकऱ्यांना सौर ऊर्जा वापरण्यास अधिक प्रोत्साहन मिळेल आणि शेती उत्पादनातही वाढ होईल.
Mumbai,Maharashtra
June 22, 2025 8:29 AM IST
गुड न्यूज! सौर कृषी पंप धारकांसाठी हेल्पलाईन नंबर सुरू, शेतकऱ्यांना या सुविधा मिळणार
