Lemon rate: ऐन उन्हाळ्यात लिंबाचं मार्केट पडलं, व्यापाऱ्यांनी सगळं गणित सांगितलं, Video

सोलापूर – गेल्या काही काळात वाढत्या उन्हामुळे लिंबाला सोन्याचं मोल आलं आहे. आवक कमी असल्याने लिंबाचे दर 120 ते 180 रुपये किलोपर्यंत गेले होते. आता मात्र सोलापूर कृषी उत्पन्न बाजार समितीत लिंबाची आवक वाढली असून त्याचा परिणाम लिंबाच्या दरांवर देखील होत आहे. सोलापूरच्या लिंबू बाजारात 10 किलोला 400 रुपयांपर्यंत दर घटले आहेत. याबाबत सोलापुरातील लिंबू व्यापारी अल्ताफ लिंबूवाले यांनी माहिती दिलीये.

सोलापूर कृषी उत्पादन बाजार समितीत लिंबूची आवक वाढली आहे. बाजारात नवीन लिंबू आल्याने लिंबूचे दर कमी होत आहेत. आवक वाढल्याने 1200 रुपये 10 किलोने मिळणारा लिंबू आता 800 ते 900 रुपये 10 किलो रुपये दराने मिळत आहे. येणाऱ्या काही दिवसांनी लिबूची आवक परत वाढणार आहे. त्यामुळे पुन्हा लिंबू दरात 100 ते 150 रुपयांनी घट होण्याची शक्यता लिंबूवाले यांनी व्यक्त केलीये.

हिरव्या लिंबामुळे भाव घटले

सोलापूर आणि आजूबाजूच्या मार्केटमध्ये हिरवा लिंबू विकत नाही. हिरवा लिंबू हा सोलापूरतील मार्केट यार्ड येथून विक्रीसाठी इतर जिल्ह्यांत पाठविला जातो. इतर जिल्ह्यात लिंबू पाठविताना त्या लिंबूचा आकारा मोठा लागतो. बाजारात विक्रीसाठी आलेला नवीन लिंबू हा हिरवा असून आकाराने लहान आहे. त्यामुळे लिंबूचे दर काही प्रमाणात कमी होत आहे. शेतकऱ्यांनी लिंबू बाजारात विक्रीसाठी आणत असताना मोठ्या आकाराचे हिरवे लिंबू आणावे, असे आवाहन लिंबू व्यापारी अल्ताफ लिंबूवाले यांनी केले आहे.

सोलापूर कृषी उत्पन्न बाजार समितीत लिंबूची आवक दक्षिण सोलापूर, अक्कलकोट, उत्तर सोलापूर तालुक्यातील वडाळा तसेच वैराग, बार्शी येथून होत आहे. बाजार समितीत येणाऱ्या 50 टक्के लिंबूची विक्री सोलापूर जिल्ह्यात होते. तर उर्वरित लिंबू हा दक्षिणेतील आंध्रप्रदेश, कर्नाटक, तामिळनाडू आणि आग्रा, दिल्ली, जयपूर येथील मोठ्या बाजारपेठांमध्ये जातो. या ठिकाणी लिंबू हिरवा आणि मोठा असणं आवश्यक आहे, असंही लिंबूवाले सांगतात.