Youtube वर पाहिली माहिती, अव्होकॅडोची केली शेती, शेतकऱ्याला वर्षाला 11 लाख रुपयांचा नफा, Video

परमेश्वर थोरात यांच्याकडे एकूण पाच एकर शेती आहे. सुरुवातीला ते संपूर्ण शेतजमिनीत पारंपारिक पिकांची शेती करत होते. मात्र, पाण्याची कमतरता आणि उत्पादन खर्च वाढल्यामुळे उत्पन्न फारच कमी मिळत होते. त्यामुळे शेती परवडत नव्हती. याचवेळी त्यांनी यूट्यूबवर अव्होकॅडो या विदेशी फळाबद्दल माहिती पाहिली आणि त्यांनी या फळाची सखोल माहिती घेण्यास सुरुवात केली.

अव्होकॅडो हे कमी पाण्यातही उगम पावणारे, बाजारात चांगली किंमत मिळणारे आणि पोषणमूल्यांनी भरलेले फळ आहे हे लक्षात आल्यावर त्यांनी एक एकर शेतजमिनीत अव्होकॅडोची लागवड केली. सुरुवातीला त्यांनी काही झाडे लावून प्रयोग केला. योग्य काळजी घेतल्यामुळे काही वर्षात झाडांना फळे यायला सुरुवात झाली आणि उत्पन्न मिळायला लागलं.

आज परमेश्वर थोरात यांना अवघ्या एका एकर अव्होकॅडो शेतीतून दरवर्षी किमान 11 लाख रुपयांचा नफा मिळतो आहे. उर्वरित चार एकरमध्ये ते अजूनही पारंपरिक शेती करत आहेत. परंतु अव्होकॅडोच्या यशस्वी प्रयोगानंतर ते भविष्यात अजून क्षेत्रात या पिकाची लागवड करण्याचा विचार करत आहेत. कमी पाण्यात जास्त उत्पन्न देणारी ही शेती त्यांच्यासाठी लाभदायक ठरली आहे.

परमेश्वर थोरात यांचा प्रवास इतर शेतकऱ्यांसाठी प्रेरणादायी ठरत आहे. पारंपारिक शेतीबरोबर नव्या पिकांचा स्वीकार केल्यास आर्थिकदृष्ट्या उन्नती साधता येते याचा वस्तुपाठ त्यांनी घालून दिला आहे. पाण्याच्या टंचाईतही योग्य निर्णय आणि मेहनतीने यश मिळवता येते हे त्यांनी दाखवून दिले आहे.