Last Updated:
सांगलीच्या कडेगाव तालुक्यातील वांगी गावचे शेतकरी दिलीप मोहिते शेतीला वाहून घेत शेतीतून समृद्धी प्राप्त करत आहेत. मागील वर्षी पैशाचे पीक ओळख असणाऱ्या आल्याच्या शेतीत त्यांना यावर्षी तोटा सहन करावा लागला आहे.
सांगली: सांगलीच्या कडेगाव तालुक्यातील वांगी गावचे शेतकरी दिलीप मोहिते शेतीला वाहून घेत शेतीतून समृद्धी प्राप्त करत आहेत. गेल्या पंचवीस वर्षांपासून ते शेतामध्ये वेगवेगळ्या पिकांचे अभ्यासपूर्ण प्रयोग करतात. नऊ एकर शेतामध्ये ऊस, भाजीपाल्यासह नवनवीन पिकांचे प्रयोग करत अलीकडील दोन वर्षांपासून आल्याचे उत्पादन घेत आहेत. मागील वर्षी पैशाचे पीक ओळख असणाऱ्या आल्याच्या शेतीत त्यांना यावर्षी तोटा सहन करावा लागला आहे.
प्रयोगशील शेतकरी दिलीप मोहिते यांनी मागील दोन वर्षात 35 गुंठे क्षेत्रामध्ये आल्याची लागवड केली होती. खत, पाण्याचे योग्य नियोजन करत त्यांनी 13 टन आल्याचे उत्पादन घेतले होते. तेव्हा 72 रुपये प्रति किलो बाजारभाव मिळून त्यांना भरघोस नफा मिळाला होता. यानंतर मात्र पैशाचे पीक म्हणून आले पिकाकडे पाहत आल्याची मोठ्या प्रमाणात लागवड झाली.
मागील वर्षी सन 2024 मध्ये घरचे 13 टन आले 72 रुपये प्रति किलो प्रमाणे विकून त्यांनी तीन टन दर्जेदार बियाणे विकत घेतले. आणि एक एकर क्षेत्रावरती आल्याची लागवड केली.
एक एकर आल्याचा उत्पादन खर्च:
बियाणे(3टन): 1 लाख 10 हजार
शेणखत(10 ट्रॉली): 50 हजार
खते (रासायनिक आणि सेंद्रिय): 50 हजार
सिंचन व्यवस्था,मजूर व ट्रॅक्टर मेहनत: 1.5 लाख
आले उत्पादनाचा उच्चांक
सततच्या पावसाने यंदा आल्यावरती मोठ्या प्रमाणात कंदकुज रोगाचा प्रादुर्भाव असताना देखील मोहिते यांनी उत्पादनाचा उच्चांक गाठला. मागील वर्षीचा अनुभव लक्षात घेऊन योग्य व्यवस्थापन करत त्यांनी एकरी 15 टनाचे दर्जेदार उच्चांकी उत्पादन घेतले आहे.
अनुदान देण्याची मागणी
सध्या आले पिकाचे दर कोलमडले आहेत. प्रतिकिलो अवघा 18 रुपये दर मिळत आहे. यामुळे सध्या आले उत्पादकांनी शेतात घातलेला खर्चही निघत नसल्याने कठीण झाले आहे. आल्याचे पीक घेणाऱ्या शेतकऱ्यांना शासनाकडून अनुदान मिळावे, अशी प्रतिक्रिया आले उत्पादक शेतकऱ्यांनी लोकल 18 सोबत बोलताना व्यक्त केली. एकरी 4 लाख रुपये उत्पादन खर्च येतो. गेल्या वर्षीच्या तुलनेत 80 टक्के भाव घसरल्याने मिळकतीचे गणित कुठेच जुळत नाही, असे आले उत्पादक शेतकरी दिलीप मोहिते सांगतात.
Sangli,Maharashtra
Ginger Farming : आल्याच्या उत्पादनाचा उच्चांक, एकरी केला लाखोंचा खर्च, पण शेतकऱ्याचा पदरी निराशाच, Video
